Öryggisvörður í heimferða- og fylgdadeild

Embætti ríkislögreglustjóra óskar eftir öflugum og áreiðanlegum öryggisverði til starfa í búsetuúrræði sem heimferða- og fylgdadeild rekur og er tengiliður deildarinnar við einstaklinga sem dvelja í úrræðinu. Áhersla er lögð á að til starfsins veljist einstaklingur sem býr yfir ríkulegri þjónustulund, á auðvelt með að sýna hluttekningu og gætir þess að sýna fyllstu kurteisi og virðingu fyrir aðstæðum íbúa í samskiptum sínum við þá. Um er að ræða 100% starf og vinnufyrirkomulagið er vaktavinna. Umsóknarfrestur er til og með 10. febrúar næstkomandi.

Embætti ríkislögreglustjóra er lifandi vinnustaður þar sem starfa rúmlega 250 starfsmenn sem sinna fjölbreyttum verkefnum. Lögð er áhersla á opin og jákvæð samskipti, markvissa starfsþróun og framfylgir embættið stefnu um samræmingu fjölskyldulífs og vinnu.

Leitað er að einstaklingi sem hefur vilja og færni til að styðja við megináherslur embættisins, sem eru þjónusta, forysta, mannauður, nýsköpun og samstarf.