Salurinn er tónlistarhús í hjarta Kópavogsbæjar. Salurinn er fyrsti sérhannaði tónleikasalur landsins og ein af menningarstofnunum Kópavogs sem finna má á Borgarholtinu ásamt Gerðarsafni, Náttúrufræðistofu Kópavogs og Bókasafni Kópavogs. Í Salnum er framleidd metnaðarfull dagskrá auk þess sem húsið er eitt vinsælasta tónlistarhús landsins til útleigu. Salurinn tekur allt að 300 gesti í sæti en frá því að Salurinn var tekinn í notkun hafa verið haldnir þar fjölmargir tónleikar, ráðstefnur, námskeið, verðlaunaafhendingar, alþjóðlegt skákmót, píanókeppnir, afmælisveislur, fermingar, brúðkaup og svo mætti áfram telja. Meginhlutverk Salarins er að auðga tónlistarlíf í Kópavogi og efla almennan áhuga og þekkingu á tónlist. Það er meðal annars gert með fjölbreyttu tónleikahaldi sem og að eiga farsælt samstarf við þá aðila sem vinna að skyldum markmiðum og þá einkum við höfunda og flytjendur tónlistar, einstaklinga, hópa, stofnanir og fyrirtæki sem halda viðburði í Salnum.