Leikskólinn Tjörn óskar eftir leikskólakennara til starfa.

Leikskólinn Tjörn er fjögurra deilda leikskóli með 70 börnum á aldrinum 2–6 ára. Skólinn er starfræktur í tveimur húsum, annars vegar við Tjarnargötu við Tjörnina í Reykjavík og hins vegar á Öldugötu, steinsnar frá Landakotstúni.

Nánasta umhverfi leikskólans er einstakt og býður upp á fjölbreytt námstækifæri. Í nágrenni skólans eru Hljómskálagarðurinn, Landakotstún, Hólavallagarður, miðbærinn, Reykjavíkurhöfn, fjöldi almenningsgarða, fjaran við Ægisíðu og margar helstu menningarstofnanir borgarinnar, svo sem Listasafn Íslands, Listasafn Reykjavíkur og Borgarbókasafnið.

Við leitum að skapandi, jákvæðu og áhugasömu fólki með leikskólakennaramenntun, reynslu eða áhuga á starfi með ungum börnum. Í Tjörn leggjum við áherslu á hlýlegt, faglegt og lifandi leikskólastarf þar sem frumkvæði barna, vinátta og gleði eru höfð að leiðarljósi.

Skólinn starfar í anda Reggio Emilia þar sem litið er á barnið sem hæfileikaríkan, skapandi og virkan þátttakanda í eigin námi. Við leggjum áherslu á öflugt myndlistarnám, skapandi vinnu, rannsóknir barna og tíðar vettvangsferðir í perlur borgarinnar.

Einkunnarorð Tjarnar eru: Frumkvæði, vinátta og gleði og þau endurspeglast í daglegu starfi með börnunum. Í báðum húsum starfa matreiðslumenn og allur matur er eldaður frá grunni, sem skapar heimilislegt og nærandi umhverfi fyrir börn og starfsfólk.

Leikskólakennari starfar samkvæmt lögum og reglugerð um leikskóla, öðrum lögum er við eiga, aðalnámskrá leikskóla og stefnu viðkomandi sveitarfélags.