Lækur

Lækur er sex deilda leikskóli þar sem dvelja 129 börn. Leikskólinn er staðsettur í Kópavogsdal. Lækur er í tveim byggingum en Lækjavöllur, sem er á milli skólabygginganna, er nýttur sem útiskóli og er verið að þróa starfið þar með eldri börnum skólans. Sjálfræði, umhyggja og virðing eru einkunnarorð leikskólans. Með þessi orð að leiðarljósi leggjum við áherslu á að hvetja og styðja börn í leik og starfi. Í Læk er lagt upp með lýðræðislega nálgun og þannig komið til móts við þarfir hvers einstaklings. Lækur notar kennsluhætti sem kallast einstaklingsmiðað nám og sækja kenningar til Howard Gardner, Dewey, Montessori og Piaget. Hugtakið vísar til skipulags skólastarfs sem tekur mið af námslegum þörfum hvers einstaklings fremur en hópa. Barnið vinnur sjálfstætt og í samvinnu við aðra. Kennarar og börn bera sameiginlega ábyrgð á náminu. Dæmi um vinnu eru námssvæði, lausnaleitanám t.d. barnaþing, rannsóknarhópar, valverkefni og ferilmöppur. Annað nátengt hugtakinu um einstaklingsmiðað nám er skóli án aðgreiningar sem líka tengist grunngildum okkar um jafnrétti og jafnan rétt til þátttöku. Skóli án aðgreiningar kom í kjölfar yfirlýsinga Barnasáttmálans þar sem kveðið er á um að aðildarríki viðurkenni rétt barns til menntunar og að öll börn njóti sömu tækifæra. Þannig er Lækur leikskóli sem án aðgreiningar nýtir sér einstaklingsmiðað nám til að ná sínum markmiðum.

Vinnustaðurinn

Leikskólastjóri óskast í Læk

Lækur er sex deilda leikskóli staðsettur í Kópavogsdal þar sem stutt er í góð og skemmtileg útivistarsvæði á öllum árstímum.

Í Læk er lagt upp með lýðræðislega nálgun í starfi með börnum. Leikskólinn leggur áherslu á að skapa fjölbreytilegt leikumhverfi sem ýtir undir ímyndunarafl, sköpunarkraft og tjáningu barnanna. Lögð er áhersla á góðan starfsanda sem einkennist af virðingu, umburðarlyndi, gleði og jákvæðu viðmóti. Lækur er vináttuleikskóli sem vinnur með Blæ-vináttuverkefni í samvinnu við Barnaheill. Allar deildir vinna með Lubbi finnur málbein.

Leitað er að stjórnanda sem hefur góða hæfni í mannlegum samskiptum, er skipulagður og umbótadrifinn og hefur metnað til að ná árangri í starfi. Leikskólastjóri er leiðtogi skólans, veitir faglega forystu og býr yfir hæfni og frumkvæði til að skipuleggja skapandi leikskólastarf í samvinnu við starfsfólk og menntasvið Kópavogsbæjar.

Einkunnarorð leikskólans eru sjálfræði, umhyggja og virðing.

Helstu verkefni og ábyrgð

Stjórnun og ábyrgð á daglegri starfsemi leikskólans og að unnið sé eftir aðalnámskrá leikskóla og skólanámskrá leikskólans
Faglegur leiðtogi leikskólans sem deilir verkefnum og ábyrgð til starfsfólks í samræmi við skólanámskrá
Ábyrgð á að rekstur leikskólans sé innan ramma fjárhagsáætlunar
Ábyrgð á starfsmannamálum, svo sem ráðningum, vinnutilhögun og starfsþróun
Ábyrgð á foreldrasamstarfi
Kynna sér nýjungar í starfi, miðla þekkingu til starfsfólks og hvetja til þróunar og nýbreytni í skólastarfi

Menntunar- og hæfniskröfur

Leikskólakennaramenntun og leyfisbréf kennara
Framhaldsmenntun (MA, MEd, MBA eða diplóma að lágmarki) á sviði stjórnunar eða uppeldis- og menntunarfræða
Reynsla af starfi og stjórnun í leikskóla
Reynsla af rekstri leikskóla og gerð og eftirfylgni fjárhagsáætlana
Forystuhæfileikar og góð færni í mannlegum samskiptum
Fagleg forysta, sýn og vilji til nýbreytni og þróunar í leikskólastarfi
Frumkvæði, lausnamiðuð hugsun og metnaður til að ná árangri í starfi
Góð íslenskukunnátta og færni til að tjá sig bæði í ræðu og riti

Fríðindi í starfi

Starfsfólk Kópavogsbæjar fær frían aðgang að sundlaugum bæjarins

Styttri vinnuvika, stytting að hluta til notuð í vetrar-, páska- og jólafrí

Umsókn skal fylgja starfsferilskrá og kynningarbréf þar sem gerð er grein fyrir ástæðu umsóknar og rökstuðningur fyrir hæfni viðkomandi í starfið.

Laun eru samkvæmt kjarasamningi Sambands íslenskra sveitarfélaga og viðeigandi stéttarfélags.

Þeir sem ráðnir eru til starfa í leikskóla Kópavogsbæjar þurfa að undirrita heimild til upplýsingaöflunar úr sakaskrá.

Tekið er mið af jafnréttisstefnu Kópavogsbæjar og jafnréttislögum við ráðningu í starfið.

Umsóknarfrestur er til og með 17. apríl 2025.

Upplýsingar um starfið gefur Sigrún Hulda Jónsdóttir, deildarstjóri leikskóladeildar í netfanginu [email protected].

Einungis er tekið við umsóknum í gegnum ráðningarvef Alfreðs.

Auglýsing birt3. apríl 2025

Umsóknarfrestur17. apríl 2025