Leikskólastjóri, Leikskólinn Tröllaborg

Skagafjörður óskar eftir að ráða í tímabundna stöðu leikskólastjóra skólaárið 2026-27 vegna afleysinga.

Leitað er að metnaðarfullum einstaklingi sem býr yfir leiðtogahæfileikum og hefur reynslu og þekkingu á leikskólastarfi. Viðkomandi þarf að hafa brennandi áhuga á leikskólastarfi, skólaþróun, stjórnun og forystu. Um er að ræða tímabundna árs afleysingu í 100% starfshlutfalli skólaárið 2026-27.

Leikskólinn Tröllaborg er tveggja deilda leikskóli sem rekinn er í tveimur byggðakjörnum, Hofsósi og Hólum. Í leikskólanum eru 30 börn á aldrinum 1-5 ára. Leikskólinn Tröllaborg er SMT leikskóli og heilsueflandi leikskóli. Á næsta skólaári verður áhersla lögð á innleiðingu Heillaspora. Við sem í leikskólanum störfum vinnum eftir framtíðarsýn menntastefnu Skagafjarðar og aðalnámskrá leikskóla. Aðaláhersla er á leikinn, læsi, skapandi starf og félagslega færni, með það að markmiði að hver einstaklingur fái notið sín sem best. Kjörorð leikskólans er: Leikum saman og lærum.

Helstu verkefni og ábyrgð

• Veita skólanum faglega forystu og móta stefnu hans innan ramma laga og reglugerða og í samræmi við aðalnámskrá leikskóla.
• Leiða og bera ábyrgð á rekstri, þjónustu og daglegri starfsemi leikskólans.
• Hafa forystu um og bera ábyrgð á mannauðsmálum, s.s. ráðningum, vinnutilhögun og starfsþróun.
• Að leiða samstarf starfsfólks, foreldra og leikskólans af yfirvegun og virðingu.
• Að halda uppi jákvæðum samskiptum og farsælli lausn ágreinings þegar þörf er á.
• Að stuðla að öruggu, faglegu og virku samstarfi í samræmi við farsældarlög.
• Eftirlit með húsnæði og leiksvæði skólans.

Menntunar- og hæfniskröfur

• Leyfi til að nota starfsheitið kennari og kennslureynsla skilyrði.
• Reynsla af faglegri forystu á sviði kennslu og þróunar leikskólastarfs æskileg.
• Viðbótarmenntun í stjórnun er æskileg.
• Framúrskarandi færni í mannlegum samskiptum er skilyrði.
• Gott vald á íslensku í ræðu og riti.
• Sjálfstæð og skipulögð vinnubrögð.
• Hreint sakavottorð skv. lögum um leikskóla.

Leikskólakennarar starfa samkvæmt lögum og reglugerð um leikskóla, öðrum lögum er við eiga, aðalnámskrá leikskóla, skólastefnu sveitarfélagsins sem og öðrum stefnum sveitarfélagsins sem í gildi eru á hverjum tíma og við eiga.

Launakjör eru samkvæmt kjarasamningi Sambands íslenskra sveitarfélaga við KÍ vegna Félags stjórnenda leikskóla.

Nánari upplýsingar um starfið veitir:

Bryndís Lilja Hallsdóttir, sviðsstjóri fjölskyldusviðs, [email protected], s. 849 5135.

Einungis er tekið við rafrænum umsóknum á heimasíðu sveitarfélagsins: www.skagafjordur.is. Prófskírteini, leyfisbréf og greinargóð ferilskrá skal fylgja umsókn.

Áhugasamir einstaklingar, óháð kyni, eru hvattir til að sækja um.

Öllum umsóknum verður svarað þegar ákvörðun um ráðningu liggur fyrir.