Launaráðgjafi á launaskrifstofu

Fjármála- og áhættustýringarsvið Reykjavíkurborgar leitar eftir öflugum ráðgjafa í starf launaráðgjafa á launaskrifstofu. Leitað er að einstaklingi sem býr yfir mikilli samskiptahæfni, sýnir frumkvæði og hefur tileinkað sér sjálfstæð vinnubrögð. Unnið er með mannauðs- og launakerfi SAP og krefst vinnan skipulagshæfni og nákvæmni.

Launaskrifstofa sinnir launavinnslu borgarinnar og afgreiðslu launa, launatengdum gjöldum og skilum á staðgreiðslu launa. Þá veitir skrifstofan ráðgjöf til stjórnenda og mannauðsráðgjafa, sinnir fræðslu- og gæðamálum vegna launavinnslu og meðhöndlunar launagagna, hefur eftirlit með framkvæmd kjarasamninga, auk fleiri verkefna er heyra undir skrifstofuna. Skrifstofan hefur aðsetur að Borgartúni 12-14.