Hjúkrunarfræðingur á legudeild geðrofssjúkdóma

Hefur þú áhuga á að starfa í umhverfi þar sem lögð er áhersla á fagmennsku, starfsþróun, teymisvinnu og góðan starfsanda?

Legudeild geðrofssjúkdóma óskar eftir áhugasömum hjúkrunarfræðingi sem vill efla sig á sviði geðhjúkrunar. Starfið hentar vel þeim sem brenna fyrir leiðtogahæfni, samskiptatækni, öryggi og fjölbreytta vinnu. Áhersla er lögð á notendamiðaða þjónustu og góðan starfsanda. Starfshlutfall er 80-100%, möguleiki er á sérstöku næturvakta starfshlufalli. Starfið er laust frá 11. ágúst 2025 eða eftir nánara samkomulagi.

Legudeild geðrofssjúkdóma sinnir greiningu, meðferð og endurhæfingu fólks með geðrofssjúkdóma. Deildin er 16 rúma, 10 rými ætluð einstaklingum með bráð veikindi og 6 ætluð til endurhæfingar. Á deildinni er boðið upp á samtalsmeðferð, virknimeðferð, fræðslu og lyfjameðferð. Markmið meðferðarvinnu er að auka lífsgæði og valdefla sjúklinga, draga úr hamlandi geðrofseinkennum og þjálfa upp bjargráð til að lifa með geðrofssjúkdóm. Deildin státar af góðri þverfaglegri teymisvinnu og er sérstök áhersla lögð á að veita aðstandendum stuðning og fræðslu.

Það eru spennandi tímar í geðhjúkrun og mikil áhersla er á eflingu hjúkrunar í þjónustunni. Hjúkrunarfræðingum, nýútskrifuðum sem og reyndum, gefst kostur á sérhæfðu starfsþróunarári með öflugri faghandleiðslu með það að markmiði að dýpka þekkingu sína á geðhjúkrun og byggja upp frekari meðferðarhæfni. Boðið verður upp á einstaklingshæfða aðlögun á deild undir leiðsögn reyndra hjúkrunarfræðinga.

Unnið er á þrískiptum vöktum, morgun-, kvöld- og næturvöktum. Vinnuvika starfsfólks í fullri vaktavinnu er 36 stundir og getur orðið minni eftir samsetningu vakta. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.