Hjúkrunardeildarstjóri á öryggisgeðdeild

Laus er til umsóknar tímabundin staða hjúkrunardeildarstjóra á Öryggisgeðdeild. Starfið er auglýst sem tímabundið til 2 ára. Leitað er að kraftmiklum hjúkrunarfræðingi með reynslu af stjórnun og hæfni til að leiða krefjandi þjónustu við sjúklinga og aðstandendur. Viðkomandi þarf að hafa hæfni til að leiða þverfaglega teymisvinnu og efla notendamiðaða nálgun, umbótastarf, öryggismál og uppbyggingu mannauðs í nánu samstarfi við aðra stjórnendur og starfsfólk.

Öryggisgeðdeild er hluti af réttar- og öryggisgeðþjónustu á Landspítala. Öryggisgeðdeildin er átta rúma legudeild sem sinnir sérhæfðri meðferð og endurhæfingu sjúklinga með alvarlegan og þungan geðrænan vanda. Meðferðarnálgun deildarinnar er fjölþætt og ræðst af þörfum og getu hvers og eins sjúklings. Meginmarkmið meðferðarinnar er að sjúklingar fái þá meðferð og endurhæfingu sem er nauðsynleg til þess að þeir geti komist aftur út í samfélagið með góðum lífsgæðum. Miklar umbætur standa nú yfir í réttar- og öryggisgeðþjónustunni bæði á húsnæði og starfsemi og mun hjúkrunardeildarstjóri taka virkan þátt í þeim. Á vormánuðum flyst öryggisgeðdeildin á milli hæða á Kleppi á nýuppgerða deild sem mætir að mörgu leyti nútíma kröfum geðþjónustu.

Hjúkrunardeildarstjóri er í forystu fyrir starfsemi öryggisgeðdeildar ásamt yfirlækni réttar- og öryggisgeðþjónustu og stýrir daglegum rekstri. Hjúkrunardeildarstjóri starfar í nánu samstarfi við forstöðuhjúkrunarfræðing, framkvæmdastjóra, yfirlækni deildar, aðra deildarstjóra í réttar- og öryggisgeðþjónustu og aðra stjórnendur þeirra fagstétta sem starfa á einingunni. Hjúkrunardeildarstjóri hefur þríþætta ábyrgð sem stjórnandi, þ.e.a.s. faglega ábyrgð, starfsmannaábyrgð og fjárhagslega ábyrgð. Starfshlutfall er 100% og veitist starfið frá 1. maí 2026 eða eftir nánara samkomulagi, til tveggja ára. Næsti yfirmaður er forstöðuhjúkrunarfræðingur kjarna 1 í geðþjónustu.