Myndstef – Myndhöfundasjóður Íslands eru höfundaréttarsamtök sjónlistafólks á Íslandi og eru viðurkennd af ráðuneyti. Myndstef er stjórnað af höfundum, en í stjórn Myndstefs eru eingöngu höfundar; ljósmyndarar, myndlistarmenn, hönnuðir og arkitektar. Skráðir félagsmenn eru um 2.700 talsins. Myndstef sér um að innheimta og úthluta höfunda-og fylgiréttargreiðslur vegna afnota og endursölu höfundavarinna verka. Samtökin veita höfundum aðgang að lögfræðilegri ráðgjöf varðandi höfundarétt og gerð samninga. Einu sinni á ári veita samtökin ferða- og menntunarstyrki og verkefnastyrki til sjónlistahöfunda. Myndstef stendur fyrir fjölmörgum kynningum og fræðslu til höfunda og notenda listaverka. Samtökin fylgjast með og leitast við að hafa áhrif á þróun laga og reglna svo og viðskiptahátta á höfundaréttarsviði ásamt því að annast samningagerð félagsmanna við opinbera aðila og einkaaðila um höfundaréttarleg hagsmunamál félagsmanna.