Aðstoðardeildarstjóri klínískrar lyfjaþjónustu á Landspítala

Lyfjaþjónusta Landspítala auglýsir eftir metnaðarfullum klínískum lyfjafræðingi í starf aðstoðardeildarstjóra klínískrar lyfjaþjónustu.

Viðkomandi þarf að hafa reynslu í störfum í almennri lyfjaþjónustu, stjórnun, rekstri, ásamt gæða- og umbótastarfi og vera tilbúinn til að taka þátt í umbreytingu sem fram undan er í starfseminni.

Aðstoðardeildarstjóri starfar náið með deildarstjóra/forstöðumanni og tekur virkan þátt í stjórnun, þróun á skipulagi, aukinni þjónustu, mannauðsmálum, ásamt innleiðingu nýjunga er stuðla að auknum gæðum, starfsánægju og öryggi sjúklinga.

Leitað er eftir einstaklingi með framúrskarandi leiðtoga- og samskiptahæfni, stjórnunarreynslu, hæfni til að móta jákvætt starfsumhverfi og byggja upp sterka liðsheild. Viðkomandi þarf að búa yfir frumkvæði, eldmóði og hafa áhuga á að starfa með stjórnendum og starfsfólki við að stuðla að framþróun og umbótum í þjónustu sem styður við starfsemi Landspítala.

Lyfjaþjónusta heyrir undir svið Klínískrar rannsókna- og stoðþjónustu á Landspítala og ber m.a. ábyrgð á öflun og varðveislu lyfja, lyfjablöndun, lyfjaskömmtun, hefur eftirlit með notkun lyfja á spítalanum og veitir ráðgjöf um lyfjatengd mál til starfsfólks og sjúklinga, ásamt því að taka á móti fjölda nema á hverju ári.

Hjá lyfjaþjónustu Landspítala starfa um 100 einstaklingar í samhentri deild og fást þar við fjölbreytt og skemmtileg verkefni. Starfshlutfall er 100% og er starfið laust nú þegar eða samkvæmt nánara samkomulagi.