Safnstjóri

Listasafn Reykjavíkur hýsir þrjú megin söfn í þremur sýningarhúsum; safn Ásmundar Sveinssonar í Ásmundarsafni, safn Jóhannesar Kjarvals á Kjarvalsstöðum og safn verka Erró í Hafnarhúsi.  Safnið skal einnig safna, skrá, varðveita og sýna eins fullkomið safn íslenskrar myndlistar sem unnt er; rannsaka og sinna fræðslu um myndlist m.a. með fjölbreyttu sýningarhaldi, fyrirlestrum, leiðsögn, útgáfustarfsemi og útlánum verka. Þannig stuðli safnið  að því að borgarbúum og öðrum gestum safnsins sé gert kleift að fylgjast með helstu straumum og stefnum í myndlist innanlands og á alþjóðavettvangi.

Listasafn Reykjavíkur hefur jafnframt umsjón með myndverkum á almannafæri í eigu borgarinnar. 

Listasafn Reykjavíkur starfar samkvæmt samþykktum Reykjavíkurborgar, siðareglum ICOM - Alþjóðaráðs safna, safnalögum nr. 141/2011, og lögum um skil menningarverðmæta til annarra landa nr. 57/2011.

Sjá nánar um hlutverk og starfsemi á vefsíðu safnsins http://www.listasafnreykjavikur.is.

Leiðarljós og tilgangur Menningar- og íþróttasviðs Reykjavíkurborgar
Að öll geti upplifað og notið menningar, íþrótta og útilífs á fjölbreyttan hátt. Þannig stuðlum við að gleði, vellíðan og bættri lýðheilsu í Reykjavík.  

Undir sviðið heyra meðal annars; Listasafn Reykjavíkur, Borgarbókasafn Reykjavíkur, Borgarsögusafn Reykjavíkur, Bókmenntaborg Reykjavíkur, Tónlistarborg, sundlaugar borgarinnar, Hitt Húsið, Fjölskyldu- og húsdýragarðurinn, Nauthólsvík, Ylströnd, skíðasvæðin og íþróttamannvirki.  Sviðið hefur jafnframt umsjón með samskiptum vegna rekstrasamninga og styrkja í menningar-, útilífs og íþróttamálum og er borgaryfirvöldum til faglegrar ráðgjafar í þeim málaflokkum sem undir það heyra.

Nánar um ferlið:

Umsækjendur skulu senda inn ferilskrá (hámark 2 bls.) ásamt kynningarbréfi (hámark 1 bls.),  á íslensku. Þar skal gera grein fyrir þeirri þekkingu, reynslu og hæfni umsækjanda sem nýtist til að sinna starfinu í samræmi við hæfniskröfurnar í auglýsingunni. Jafnframt er óskað eftir greinargerð að hámarki 2 A4 blaðsíður þar sem umsækjandi lýsir framtíðarsýn sinni fyrir Listasafn Reykjavíkur.

Umsóknir á erlendum tungumálum, án kynningarbréfa eða án ferilskráa verða ekki teknar til greina. Einnig skal fylgja umsókn staðfesting á prófgráðum. Við ákvörðun um boðun í starfsviðtal verður sérstaklega horft til gæða umsóknargagna.

Gert er ráð fyrir að viðtöl fari fram í viku 26 og 27. Umsækjendum sem komast lengra áfram í ráðningarferlinu verður gert að leysa verkefni. Auk annarra hæfnisþátta koma verkefnin heildstætt inn í mat á hæfni umsækjenda til að sinna starfinu. Við ákvörðun um ráðningu verður, auk framangreindra hæfnisviðmiða, tekið mið af frammistöðu í starfsviðtali og umsagna sem aflað er.

Safnstjóri er ráðinn til fimm ára að höfðu samráði við menningar-  og íþróttaráð Reykjavíkurborgar sem getur ákveðið að framlengja ráðningu safnstjóra einu sinni til næstu fimm ára.

Launakjör eru samkvæmt kjarasamningi Reykjavíkurborgar og viðkomandi stéttarfélags. Áhugasamir einstaklingar, óháð kyni, eru hvattir til að sækja um starfið.

Umsóknarfrestur er til og með 12. júní nk.

Nánari upplýsingar um starfið veitir Auður Bjarnadóttir ([email protected]) og Hilmar G. Hjaltason ([email protected]). Skipuð verður þriggja manna hæfnisnefnd sem mun vinna úr öllum umsóknum í samvinnu við ráðgjafa hjá Vinnvinn. Öllum umsóknum verður svarað að ráðningu lokinni.
​​​​​​​
Vakin er athygli á stefnu Reykjavíkurborgar um jafnan hlut kynja í störfum og að vinnustaðir borgarinnar endurspegli það margbreytilega samfélag sem borgin er.