Skrifstofustjóri á Suðurlandi - virkjaðu mannauðinn með okkur!

Skrifstofustjórar okkar starfa í hverjum landsfjórðungi og gegna fjölbreyttu hlutverki auk þess að vera nokkurs konar fulltrúar fyrirtækisins í sínum fjórðungi, t.d. gagnvart samfélögum á svæðinu. Verkefni skrifstofustjóra okkar eru margvísleg og snúa meðal annars að fræðslu og aðbúnaði starfsfólks og mannauðsmálum almennt. Þeir taka einnig þátt í skipulagningu viðburða og kynninga og móttöku gesta og skólahópa. Auk þess hafa skrifstofustjórar okkar umsjón með ýmis konar uppgjörum og kostnaðarlegri ábyrgð og eftirliti og styðja við fjármálasvið á sínum svæðum. Þetta er sannarlega rétta starfið fyrir þau sem vilja vera inni í öllu og njóta þess að vinna með fólki.   

Við leitum að skipulagðri og viðmótsþýðri manneskju með metnað og reynslu þegar kemur að mannauðsmálum, breytingastjórnun og eflingu góðra samskipta til að þjóna starfsfólki okkar og viðskiptavinum á Suðurlandi. Við viljum fá kraftmikla og sjálfstæða manneskju sem hefur hugmyndaflug og frumkvæði til að leiða bæði fólk og verkefni áfram. Umsækjendur ættu að hafa brennandi áhuga á því að móta jákvæða vinnustaðarmenningu og efla hag og velferð bæði starfsfólks og fyrirtækisins. Mikilvægt er að umsækjendur hafi menntun sem nýtist í starfi, reynslu af mannauðsmálum og gott auga fyrir tölum.