Kópahvoll

Leikskólinn Kópahvoll starfar í tveimur húsnæðum, við Bjarnhólastíg 26 og við Skólatröð í Kópavogi. Í leikskólanum dvelja 134 börn og eru sjö deildir starfandi við skólann. Yngri börnin dvelja í húsnæði við Bjarnhólastíginn sem stendur við Víghólinn sem er friðað svæði og eldri börnin í húsnæði við Skólatröð. Einkunnarorð skólans eru gleði, samkennd, frelsi og hugrekki og endurspeglast þau í öllu starfi skólans. Leikskólinn Kópahvoll starfar eftir hugmyndafræðinni Uppeldi til ábyrgðar þar sem lögð er áhersla á jákvæð samskipti, ábyrgð, sjálfstæði og virðingu. Kópahvoll er Réttindaskóli UNICEF og byggir starf sitt á Barnasáttmála Sameinuðu þjóðanna. Í skólanum er lögð rík áhersla á að réttindi barna séu virt í daglegu starfi og að börn fái raunveruleg tækifæri til þátttöku og áhrifa. Lýðræði er leiðarljós í öllu starfi leikskólans og eru börnin hvött til að tjá skoðanir sínar, taka þátt í ákvörðunum sem varða leik þeirra og nám og læra að bera virðingu fyrir sjónarmiðum annarra. Með því að rækta lýðræðisleg gildi, samábyrgð og virka þátttöku er markvisst unnið að því að efla börn sem sjálfstæða, ábyrgða og virka þátttakendur í samfélaginu.

About

Matráður/Kokkur

Leikskólinn Kópahvoll óskar eftir að ráða matráð í framtíðar starf.

Kópahvoll er sjö deilda skóli með 134 börnum. Skólinn starfar í tveimur húsnæðum. Ráðningin á við húsnæðið við Skólatröð, þar eru þrjár deildar og um 60 börn. Skólinn starfar samkvæmt aðalnámskrá leikskóla. Við skólann starfar reynslumikill hópur kennara og starfsmanna sem leggur áherslu á að gera góðan skóla betri alla daga.

Leikskólinn Kópahvoll leggur ríka áherslu á að bjóða upp á heilsusamlegt fæði og fylgja faglega viðurkenndum ráðleggingum um næringu barna. Þar sem næringarefnin koma úr mörgum tegundum matvæla er lögð áhersla á fjölbreytni í fæðuvali. Ferskleiki matvæla er tryggður og maturinn eldaður frá grunni. Með fjölbreytni að leiðarljósi er þess sérstaklega gætt að börnin fái öll næringarefni og að maturinn uppfylli dagleg næringarviðmið (NV). Mikilvægt er að hjálpa börnunum að temja sér heilbrigðar matarvenjur til framtíðar. Næringarstefnunni fylgja átta vikna matseðlar sem byggja á opinberum ráðlegginum um næringu barna og unnir hafa verið af næringarfræðingi og lýðheilsufræðing.

Hefur umsjón með matreiðslu, bakstri, sérfæði og daglegri starfsemi eldhús ásamt aðstoðarmatráði.
Sér um pantanir, innkaup, birgðarvörslu og frágang á vörum sem tilheyra eldhúsi og ræstingu.
Sýnir sjálfstæð vinnubrögð.

Helstu verkefni og ábyrgð

Framleiðir holla og næringarríka fæðu fyrir börnin.
Framleiðir mat fyrir börn með fæðuofnæmi/óþol.
Hefur yfirumsjón með störfum aðstoðarmatráðs.
Mikilvægt er að eiga gott samstarf við börn og aðra starfsmenn leikskólans.
Sinnir þeim verkefnum er varðar eldhús, þvottahús sem og kaffistofu sem yfirmaður felur honum.
Sér um þrif á eldhúsi samkvæmt Gámes áætlun.
Sér um uppvask í samvinnu við aðstoðarmatráð.
Situr starfsmannafundi eftir þörfum.

Menntunar- og hæfniskröfur

Matreiðslumaður. Ef ekki fæst matreiðslumaður verður ráðinn matráður eða starfsmaður með sambærilega menntun.
Ábyrgur, stundvís, sveigjanlegur og jákvæður einstaklingur sem á auðvelt með mannleg samskipti.
Þekking á framreiðslu og bakstri.
Sjálfstæði, skipulag og metnaður í vinnubrögðum.
Hreinlæti og snyrtimennska.
Þekking og meðvitund um næringargildi og hollustu matvæla.
Þekking á matargerð fyrir börn með bráðaofnæmi og óþol.

Laun eru samkvæmt kjarasamningi Sambands íslenskra sveitarfélaga og viðeigandi stéttarfélags.

Þeir sem eru ráðnir til starfa í leikskólum Kópavogs þurfa að undirrita heimild til að afla upplýsinga úr sakaskrá.

Eingöngu er tekið við umsóknum í gegnum ráðningarvef Alfreðs.

Öllum umsóknum verður svarað þegar ákvörðun um ráðningu hefur verið tekin.

Allir einstaklingar óháð kyni, eru hvattir til að sækja um starfið.

Starfshlutfall er 100%

Nánari upplýsingar veitir Halla Ösp Hallsdóttir leikskólastjóri í síma: 4416501 netfangið: [email protected] eða Stefanía Finnbogadóttir aðstoðarleikskólastjóri í síma: 4416502 netfangið: [email protected]