Hjúkrunarfræðinemi á 3. ári - sumarstarf í krabbameinsþjónustu

Hjúkrunarnemi á 3. ári óskast til sumarstarfa í krabbameinsþjónustu Landspítala. Um er að ræða dagvinnu, með breytilegum vinnutíma í 80-100% starfshlutfalli, við hjúkrun sjúklinga í krabbameinsmeðferð/ þjónustu.

Við veitum fjölbreytta þjónustu við sjúklinga með krabbamein, bæði í lyfja- og geislameðferð og vinnum í virku teymi með öðrum fagstéttum. Margvísleg uppbygging og þróun hjúkrunar er fyrir þennan sístækkandi sjúklingahóp með gott flæði og samfellda þjónustu milli eininga með sjúklinginn í öndvegi. Við stundum einstaklingsmiðaða hjúkrun, með þátttöku fjölskyldunnar að leiðarljósi og styðjum vel við eflingu sérþekkingar í starfi.

Í boði er starf á dag- og göngudeild 11B, lyfjameðferð, möguleikar á þátttöku í störfum hjúkrunarfræðinga tengt geislameðferð á 10K

Við bjóðum upp á einstaklingshæfða aðlögun og verkefni við hæfi miðað við reynslu með reyndum hjúkrunarfræðingum. Að auki er á krabbameinsþjónustunni reglulega boðið upp á fræðslu fyrir starfsfólk. Á deildinni eru góðir möguleikar á fjölbreyttri starfsþróun og þátttöku í þróunarverkefnum í hjúkrun sjúklinga með krabbamein.

Upphaf starfs er skv. samkomulagi. Möguleiki á að í boði verði hlutastarf með námi í framhaldinu veturinn 2026-2027 á deildinni eða öðrum einingum krabbameinsþjónustu til að fá víðtækari innsýn, reynslu og þekkingu á hjúkrun krabbameinssjúklinga á mismunandi ferlum þjónustunnar.

Næsti yfirmaður er deildarstjóri dag- og göngudeildar blóð- og krabbameinslækninga. Áhugasamir eru hvattir til að hafa samband við Þórunni, deildarstjóra.

Við búum yfir öflugum og skemmtilegum hóp starfsmanna. Öflugt félagslíf er innan krabbameinsþjónustunnar og leggjum mikla áherslu á samheldni og góðan starfsanda.

Vinnuvika starfsfólks í fullri dagvinnu er 36 stundir. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.