Fjármála og efnahagsráðuneytið

Meginhlutverk fjármála- og efnahagsráðuneytis felst í yfirstjórn opinberra fjármála og efnahagsmála. Ráðuneytið fer með málefni fjármálamarkaðarins, ber ábyrgð á bættum stjórnunarháttum og áætlanagerð, hefur með höndum virka stjórn mannauðsmála ríkisins og er leiðandi í umbótum og nýsköpun í rekstri ríkisins. Ráðherra, fer með yfirstjórn ráðuneytisins og ber ábyrgð á öllum stjórnarframkvæmdum þess. Ráðuneytisstjóri stýrir ráðuneytinu undir yfirstjórn ráðherra. Ráðuneytið starfar sem ein heild og skiptist í eftirfarandi; skrifstofa efnahagsmála, skrifstofa fjármálamarkaðar, skrifstofa opinberra fjármála, skrifstofa skattamála, skrifstofa stjórnunar og umbóta, skrifstofa yfirstjórnar og skrifstofu rekstrar og innri þjónustu. Að auki starfar kjara- og mannauðssýsla ríkisins sem hluti af ráðuneytinu og telst hún vera ráðuneytisstofnun í skilningi 17. gr. stjórnarráðslaga. Ráðuneytisstjóri annast samræmingu á starfsemi skrifstofa og sviða og felur einum starfsmanna hverrar skrifstofu og sviðs staðgöngu fyrir skrifstofustjóra í fjarveru þeirra. Að auki geta verið starfræktir til lengri og skemmri tíma sérstakir verkefnahópar eða -teymi til að vinna að málefnum og verkefnum sem varða verksvið fleiri en einnar skipulagseiningar ráðuneytisins, skv. nánari ákvörðun hverju sinni.

About

Framkvæmdastjóri Stafræns Íslands

Vilt þú leiða Stafrænt Ísland?

Fjármála- og efnahagsráðuneytið auglýsir laust til umsóknar nýtt embætti framkvæmdastjóra Stafræns Íslands. Leitað er að öflugum, framsýnum og umbótasinnuðum stjórnanda sem hefur metnað fyrir stafrænni þjónustu og upplýsingatækni auk reynslu og hæfni til að leiða hóp fólks í gegnum breytingar.

Um er að ræða einstakt tækifæri til að móta og byggja upp nýja ráðuneytisstofnun sem mun gegna lykilhlutverki í stafrænni þróun og upplýsingatækni ríkisins, aukinni nýtingu gagna og innleiðingu gervigreindar.

Framkvæmdastjóri mun leiða uppbyggingu og þróun stofnunarinnar og gefst tækifæri til að móta starfsemi hennar, áherslur, skipulag og framtíðarsýn.

Um stofnunina

Stofnunin tekur til starfa 1. janúar 2027 og verður hún starfrækt sem ráðuneytisstofnun á grundvelli heimildar í 17. gr. laga nr. 115/2011 um Stjórnarráð Íslands. Mun hún sameina núverandi starfsemi Verkefnastofu um Stafrænt Ísland og upplýsingatækniverkefni sem hingað til hafa verið á ábyrgð Umbru – þjónustumiðstöðvar Stjórnarráðsins. Með nýju skipulagi verður skapaður öflugri grundvöllur fyrir áframhaldandi þróun stafrænnar þjónustu, upplýsingatæknirekstur og skilvirkari opinbera þjónustu. Framkvæmdastjóri er embættismaður og ber ábyrgð á að stofnunin starfi í samræmi við lög, stjórnvaldsfyrirmæli og erindisbréf sem fjármála- og efnahagsráðherra setur. Stofnunin heyrir undir fjármála- og efnahagsráðuneytið, undir yfirstjórn ráðuneytisstjóra.

Helstu verkefni og ábyrgð

Móta og innleiða stefnu, framtíðarsýn og tryggja skýra forgangsröðun.
Forysta í að byggja upp og leiða afkastamikinn hóp sérfræðinga og efla menningu sem byggir á samvinnu, ábyrgð og stöðugum umbótum.
Ábyrgð á daglegum rekstri.
Stuðla að árangursríkri teymisvinnu og góðum samskiptum við ráðuneyti, opinbera aðila og aðra hagaðila.
Miðla stefnu, sýn og áherslum stofnunarinnar á opinberum vettvangi og tryggja öflugt upplýsingaflæði.
Þátttaka í alþjóðlegu samstarfi á starfssviði stofnunarinnar.

Menntunar- og hæfniskröfur

Háskólapróf sem nýtist i starfi. Framhaldsmenntun er kostur.
Farsæl reynsla af stjórnun, rekstri, stefnumótun, breytingastjórnun og innleiðingu umbóta.
Leiðtogahæfni og færni í að skapa liðsheild og leiða fólk til árangurs.
Framúrskarandi samskipta- og samstarfshæfni auk getu til að ávinna traust ólíkra hagsmunaaðila.
Lausnamiðuð hugsun, frumkvæði og drifkraftur til að hrinda ákvörðunum í framkvæmd.
Yfirgripsmikil reynsla af þróun og rekstri stafrænnar þjónustu og upplýsingatækni, innleiðingu gervigreindar og öryggismálum.
Þekking á samningastýringu, innkaupum og samstarfi við birgja.
Þekking á opinberri stjórnsýslu og starfsumhverfi hins opinbera er kostur.
Hæfni til tjáningar á íslensku og ensku í ræðu og riti. Kunnátta í a.m.k. einu Norðurlandamáli er kostur.

Umsókn skal fylgja starfsferilsskrá og ítarlegt kynningarbréf á íslensku. Í kynningarbréfinu skal gera grein fyrir ástæðu umsóknar, hæfni umsækjanda til starfsins og þeim árangri sem viðkomandi hefur náð í fyrri störfum. Við mat á umsækjendum verður einnig horft til stjórnendastefnu ríkisins.

Æskilegt er að viðkomandi geti hafið störf sem fyrst.

Fjármála- og efnahagsráðherra skipar þriggja manna nefnd til að meta hæfni umsækjenda um embættið.

Nánari upplýsingar veita Íris Huld Christersdóttir, [email protected], sérfræðingur á skrifstofu stjórnunar og umbóta og Kristín Gunnarsdóttir, [email protected], mannauðsstjóri fjármála- og efnahagsráðuneytis.

Advertisement published30. October 2026

Application deadline13. November 2026

Language skills