Framkvæmdastjóri markaðssóknar og sölumála

Ertu strategískur snillingur sem hugsar stærra en stórt? Eru markaðsmál þitt annað tungumál? Hefur þú ástríðu fyrir sölu og framúrskarandi þjónustuupplifun? Ertu valdeflandi leiðtogi með hæfileika í að móta stefnu og hrinda henni í framkvæmd – þá viljum við fá þig í skemmtana- og framkvæmdastjórn Nova!

Við erum á fleygiferð inn í framtíðina og leitum að framsæknum leiðtoga sem er tilbúinn til að drífa áfram markaðs- og sölumál Nova. Þú ræður hvað þú kallar þig: Prómóter, DJ, eða kóreografer – þitt hlutverk verður að stækka dansgólfið.

Sem framkvæmdastjóri markaðssóknar og sölumála muntu leiða hóp úrvals dansara sem spila til að sigra, eru í stöðugri sókn og vilja sífellt leita leiða til að fara fram úr væntingum viðskiptavina. Við leitum að framsýnni manneskju sem hleypur hratt og vill vera í fararbroddi inn í framtíðina, skorar á og með næmt auga fyrir umbótaverkefnum sem taka okkur ennþá lengra. Þú leiðir sóknarleikinn sem krefst framúrskarandi leiðtogahæfni, drifkrafts og lausnamiðaðrar hugsunar: við viljum sjá glasið hálffullt - og helst með búbblum!

Þú munt spila lykilhlutverk í að skapa sveigjanlega og skilvirka stjórnun, innleiða árangursrík vinnubrögð og halda uppi kúltúr sem hvetur til framúrskarandi árangurs. Í því felst að drífa áfram umbreytingaverkefni sem hjálpar teyminu að spila enn betur saman og undirstrikar mikilvægi samspils milli stefnu, ferla og kúltúrs.