Ríkisendurskoðandi starfar á vegum Alþingis og er trúnaðarmaður þess, samkvæmt lögum nr. 46/2016 um ríkisendurskoðanda og endurskoðun ríkisreikninga. Hann er sjálfstæður og engum háður í störfum sínum. Skrifstofa ríkisendurskoðanda nefnist Ríkisendurskoðun. Hlutverk embættisins er að hafa í umboði Alþingis eftirlit með rekstri og fjárreiðum ríkisins og ráðstöfun almannafjár. Í þessu felst m.a. að meta hvort reikningsskil ríkisins gefi glögga mynd af rekstri og efnahag, hvort lögum og reglum sé fylgt í starfseminni og hvort frammistaða ríkisaðila við framkvæmd lögbundinna verkefna sé viðunandi með hliðsjón af markmiðum um hagkvæmni, skilvirkni og árangur í ríkisrekstri. Sjálfstæði embættisins felst í því að þótt það heyri stjórnskipulega undir Alþingi þá velur það sjálft og skipuleggur verkefni sín. Ríkisendurskoðun er því í senn sjálfstæð gagnvart Alþingi og algerlega óháð framkvæmdarvaldinu. Að þessu leyti er staða Ríkisendurskoðunar svipuð og systurembætta hennar í nágrannalöndunum. Hjá Ríkisendurskoðun starfa um 45 manns á tveimur starfsstöðvum. Aðalskrifstofa embættisins er í Bríetartúni 7 í Reykjavík en auk þess rekur embættið starfsstöð að Glerárgötu 34 Akureyri.