Í Reynisholti eru samtímis 86 börn á fjórum deildum sem bera nöfnin Bjartilundur, Geislalundur, Sunnulundur og Stjörnulundur. Leikskólinn Reynisholt er staðsettur í fallegum trjálundi í næsta nágrenni við Reynisvatn. Hann var opnaður formlega 30. nóvember 2005 og hefur leikskólastjóri starfað frá því í ágúst 2005. Þann 26. október komu fyrstu börnin í hús og var strax hafist handa við að innleiða þær áherslur sem leikskólinn lagði upp með en það er lífsleikni í skólastarfi. Sumarið 2008 var hafist handa við byggingu fjórðu deildarinnar og var hún tekin í notkun í lok október 2008. Umhverfismennt er stór þáttur í starfi leikskólans og flöggum við grænfánanum í þriðja sinn haustið 2014.