Sjúkraliði á næturvaktir á vöknun Fossvogi

Við leitum eftir metnaðarfullum sjúkraliða til starfa á vöknun. Í boði er starf á frábærum vinnustað þar sem samvinna, faglegt starf og öryggi sjúklinga eru höfð að leiðarljósi. Unnið er í vaktavinnu skv. vaktaskipulagi deildarinnar. Starfið er laust frá 1. apríl 2025 eða samkvæmt nánara samkomulagi. Starfshlutfall er 50 - 100% á næturvöktum.

Á vöknun starfa 6 sjúkraliðar og um 40 hjúkrunarfræðingar við fjölbreytt og krefjandi verkefni í nánu samstarfi við fagfólk í öðrum sérgreinum. Vöknun hefur aðsetur á þremur stöðum, E6 Fossvogi, 12A Hringbraut og 23A Kvennadeild. Deildin þjónar börnum og fullorðnum eftir svæfingar og slævingar við skurðaðgerðir og önnur inngrip. Deildin er opin allan sólarhringinn, flestir sjúklingar koma eftir skipulagðar aðgerðir á dagvinnutíma, en deildin tekur einnig á móti sjúklingum eftir bráðaaðgerðir á kvöldin, nóttunni og um helgar. Vöknun heyrir undir skurðlækninga-, skurðstofu- og gjörgæsluþjónustu.

Boðið er upp á einstaklingshæfða aðlögun undir leiðsögn reyndra sjúkraliða og hjúkrunarfræðinga.

Vinnuvika starfsfólks í fullri vaktavinnu er 36 stundir og getur orðið minni eftir samsetningu vakta. Markmiðið er að stuðla að betri heilsu og öryggi starfsfólks og auka möguleika þess til að samþætta betur vinnu og einkalíf.