Í Kópasteini eru 68 börn á aldrinum 1 árs til 5 ára á fjórum deildum sem eru aldursskiptar. Börnin fara í vinnustundir í tónlist, skapandi starfi og lífsleikni. Valkerfið (fjölbreyttur efniviður) er í boði í frjálsum leiktíma barnanna. Samverustundir eru daglega inni á öllum deildum. Leikskólinn Kópasteinn hóf starfsemi árið 1964 og er fyrsti leikskólinn í Kópavogi. Kópasteinn stendur í ákaflega fögru umhverfi í hjarta Kópavogs við Borgarholtið. Kópavogskirkjan er á hæðinni fyrir ofan okkur, Listasafn Gerðar Helgadóttur blasir við og Salurinn. Þá er Borgarholtið hér allt í kring, með nýju safnaðarheimili Kópavogskirkju á horni Hábrautar. Börnin þurfa því ekki að fara langt til að upplifa fagurt útsýni, fallegar byggingar og menningu. Vettvangsferðir eru tíðar í nærliggjandi stofnanir og nánasta umhverfi. Kópasteinn fór inn í Grænfánaverkefnið fyrir allnokkrum árum og höfum verið að flokka úrgang innan skólans síðan. Börnin eru virkir þátttakendur í því ferli en umhverfisfræðsla er stór þáttur af starfinu. Á vorin og haustin er lögð áhersla á að vinna með náttúruna í víðum skilningi. Við sáum fyrir ýmsum jurtum, setjum niður kartöflur og höldum sérstaka Umhverfisdaga í skólanum í maí. Kópasteinn tekur einnig þátt í vináttuverkefni á vegum Barnaheilla, þar er bangsinn Blær í stóru hlutverki.